Capitulum ecclesie Colocensis omnibus Christi fidelibus, presentem paginam inspecturis, salutem in salutis largitore. Ea que aguntur in tempore, ne successu temporum oblivione novercante, in irritum et in cassum revocentur litterarum solent testimonio confirmari. Proinde ad universorum notitiam tenore presentium volumus pervenire, quod quedam domina Lilium filia Andree de villa Nadudvar, relicta Mikus de villa Koll, coram nobis personaliter constituta, spontanea voluntate Nicholao, Miko et Kuthe, filiis mariti sui iam prefati, preter sinceritatem charitatis, exhibitionem reverentie et nonoris, quem eidem ante et post mortem mariti sui iam dicti impenderunt, dotem suam et res secum allatas relaxavit tali modo: quod nec ipsa Domina, nec fratres vel cognati sui Nicholaum et fratres suos prenotatos, heredes vel cognatos ratione dotis sue valebunt vel poterunt aliquatenus impetere ac molestare. In cuius rei memoriam et robur perpetue firmitatis, ad instantiam partium, presentes concessimus litteras nostras sigilli nostri munimine insignitas. Datum anno Domini Millesimo ducentesimo nonagesimo octauo. Paulo preposito, Stephano lectore, Iacobo cantore, Thoma archidiacono Colocensi, Simone Budrugiensi, Iohanne custode, Michaele decano, ceterisque fratribus in ecclesia Dei fideliter servientibus et devote.