Conventus Domus Hospitalis Jerosolomitani de Alba omnibus Christi fidelibus presentes litteras inspecturis salutem in Domino sempiternam. Uniuersitati vestre tenore presentium declaramus, quod quedam domina Chiko vocata filia Zegen de villa Vircy, relicta Herbort filii Martini ab una parte; Cazmerius filius Cozme, et Dyonisius filius Ele de villa Beren ex altera coram nobis constituti, propositum extitit per eosdem, quod cum idem Zegen pater karissimus eiusdem domine super dote et rebus parafarnalibus filie sue supradicte contra Cazmerium et Dyonisium prefatos materiam movisset questionis, prout ipsis referentibus intellegimus; tandem per arbitrium proborum virorum eadem domina sibi de dote et rebus parafarnalibus satisfactum fuisse nobis retulit viva voce. Unde sepedicta domina predictum Cazmerium et Dyonisium ac suas posteritates ab eventu questionis, que racione predictarum rerum parafarnalium posset incitari, reddidit expeditos, assummens etiam eos expedire, si racione dotis et rerum predictarum eos contingeret inpeti vel aliqualiter molestari. In cuius rei testimonium et perpetuum firmitatem ad instanciam et peticionem sepedicte domine presentes prefatis Cazmerio et Dyonisio dedimus litteras nostro sigillo communitas anno Domini Mo CCo septuagesimo quarto, tertio idus Junii. Fratre Argellino priore eodemque custode ecclesie nostre et frater Ugone preceptore domus nostre existentibus.