Conventus cruciferorum domus hospitalis de Alba omnibus presens scriptum inventibus salutem in domino sempiternam. Ad universorum notitiam presentium tenore volumus pervenire quod feria quinta proxima post dominicam Judica Bokod filio comitis Ompud ab una parte et magistro Petres filio Petres de villa Torwoy ex altera, in nostra presentia personaliter constitutis; idem Bokot confessus est terram suam totalem Sven vocatam unacum omnimo suo iuri tantummodo pertinentem ut dicebat ipsi magistro Petres pignori obligasse pro triginta marcis argenti mercimonalis receptis plenarie ab eodem hoc interposito quod si dictam terram ipse vel aliqui commetaneorum eiusdem usque ad octavam Pentecostes subsequentem redimere vellent, memoratam summam pecunie refudendo, plenam haberent eam remidendi facultatem, si vero non, ex tunc illa terra pleno iure perpetuaretur magistro Petres prenotato irrevocabiliter possidenda, et huic contractui Mortunus frater sepedicti Bokot, Cheke centurio, Waro filius Teke, Pethe centurio et Stephanus filius Hywe de commetanea villa Kelety pro se et pro populis eiusdem ville assistendo consensum prebuerunt et assensum. Adveniente itaque predicta octava Pentecostes magister Petres comparens coram nobis sepedictum Bokot et commetenos, si qui vellent redimere ex eis ipsam terram, quatvor diebus continuis expectavit, quinto autem die Bokot cum centurionibus et aliis superius nominatis et commetaneis ipsius terre ad nostram presentiam accedentes dixerunt quod memoratam terram Sven non possent redimere neque vellent ymo eam magistro Petres et suis heredibus reliquerunt perpetuo pacifice possidendam, petentes nos, ut eidem venditionem factam nostro dignaremur privilegio confirmare, quod et fecimus, petitionem eorundem iustam et legitimam attendentes. Comparavit etiam coram nobis Theodorus filius Leustachy de villa Elyas, qui pro se et Alexandro filio Baar et Luka filio Gogan commetaneis ipsius terre, contractum huiusmodi laudavit pariter et admisit. Cuius terre mete, sicut nobis partes et commetanei nominati retulerunt, hoc ordine distinguuntur. Prima siquidem meta incipit a parte septemtrionali a profunda aqua Saar, que wlgariter Evrem apellatur, et per magnum siccum fossatum vadit ad unam magnam metam terream, que est iuxta ipsum fossatum. Dehinc ascendit ad montem sub vineis existentem et procedendo in vertice eiusdem montis versus meridiem venit supra locum vinee antique. Deinde tendens directe et transiens quandam vallem pervenit ad magnam metam terream, que est in angulo eiusdem terre, iuxta viam, que venit de Kelety et vadit in Adamd. Abinde descendens in vallem versus septemtrionem venit ad duas metas terreas, et deinde procedit ad quatvor metas terreas; hinc vero ascendens in montem versus orientem venit ad duas metas terreas, et deinde per dupplices metas terreas vadit ad ipsam aquam Saar ad magnum portum wlgariter Sven Nogrevy appellatum, ibique terminatur. In cuius rei testimonium et perpetuam firmitatem magistro Petres, presentes dedimus litteras sigilli nostri munimine roboratas. Anno domini Millesimo Ducentesimo LXo Quinto, XIIIIo Kalendas Julii. Benedicto priore et custode ecclesie nostre existente.