Conventus Domus Hospitalis Iherosolimitani de Alba omnibus Christi fidelibus tam presentibus quam futuris presentium notitiam habituris salutem in Domino sempiternam. Universitati vestre tenore presencium declaramus, quod Johannes filius Pouce, et Benedictus filius Cyriaci de Lyula in nostra personaliter constituti presentia proposuerunt, quod de terra sua, quam comparaverant de relicta comitis Jako, que eidem in dotem fuerat devoluta, unum fundum seu aream curie ad quantitatem unius iugeris versus meridiem in eadem villa Lyula prope altarnicam ecclesie existentem, suo tantum iuri, nullo cognatorum suorum participante, pertinentem, ut dicebant, paulo post recessum Thatharice gentis in famis tempore vendidissent, Benke civi Albensi pro una marca argenti purissimi iure perpetuo possidendam, et pecuniam confessi sunt recepisse ab eodem. In cuius vendicionis et emptionis memoriam et firmitatem pleniorem litteras concessimus presentes sigilli nostri munimine roboratas. Anno Domini M° CC° sexagesimo quarto, quarto nonas Januarii. Fratribus Ruscano Preceptore, Tesselino Ecclesie nostre Custode existentibus.