Capitulum domus hospitalis Iherosolimitane de Alba universis Christi fidelibus tam presentibus quam futuris presentes litteras inspecturis salutem in domino sempiternam. Cunctorum notitie presentium tenore declaramus, quod Petrus filius Karachyni de villa Babun et Bence filius Symonis de inferiori villa Endred iobagiones domine Regine ex una parte, et Burnes Haab filii Andree de eadem villa Endred condicionarii ecclesie Wesprimiensis ex altera, ad nostram accedentes presentiam proposuerant, quod cum idem Haab quamquam non hostiliter sed casualiter prefatam Symonem occidisset. Tandem Bartholomeo de Gan, centurione populorum domine Regine, magistro Constantino canonico Albensi. Gekmino filio Jacobi, Phylippo, Hene filio Wyluun civibus Albensibus, et Nycolao filie Bulfach de villa Lyba, et aliis quam pluribus viris provincialibus mediantibus, Super dicta morte in talem compositionem devenerunt, ut Haab et Burnes solverent sex marcas argenti, Petro et Bence prenotatis, et sic omnis fomes discordie et materia iurgiorum sopiretur inter ipsos penitus et cessaret. Ipsam igitur pecuniam, Petrus et Bence prenominati in termino solucioni deputato, dixerunt se plenarie ab eisdem recepisse, unde Haab, et Burnes ac heredes eorum heredumque suorum successores, ab actione dicte rei reddiderunt per omnia et in omnibus expeditos. In cuius rei testimonium, et memoriam pleniorem ad instanciam et peticionem partium, litteras presentes sigilli nostri munimine roboratas. Haab et Burnes concessimus pluries memoratis. Datum Anno ab incarnacione domini M° CC° L° nono. Fratre Tesselino priore et custode, fratre Pontio preceptore ecclesie nostre existentibus.