1347.
10. 28. (Dl.86147)
Nos capitulum ecclesie Beati Irinei martyris memorie commendantes significamus
tenore presentium quibus expedit universis, quod magnifico viro Dominico bano
de Machou ab una, item Petro filio Osl consanguineo fratre suo parte ab altera
coram nobis propriis eorum in personis constitutis idem Petrus filius Osl quandam
suam possessionem Chalad vocatam totaliter, item possessionariam portionem suam
in possessione Chapud vocata habitam ipsum contingentes in comitatu Supruniensi
existentes cum omnibus ipsarum utilitatibus et pertinentiis universis ad easdem
spectantibus et uno molendino in fluvio Reepche currenti ad predictam possessionem
Chalad pertinente pro viginti marcis promptorum et dupplatorum denariorum compoti
Syrmiensis plene per ipsum Petrum prout dixit ab eodem Dominico bano habitis
et receptis a die datarum presentium per decem annorum spatium post sese succedentium
confessus extitit eidem Dominico bano sponte et liberaliter titulo impignoratitio
obligasse et impignoravit coram nobis tali conditione interiecta mediante, quod
idem Petrus prenotatam possessionem et possessionariam portionem suas modo ut
supra eidem Dominico bano impignoratas usque revolutionem ipsorum decem annorum
nullo modo nulloque quesito colore et per nullam rationem rehabere et redimere
possit a Dominico bano prenotato. Transacto autem ipso decimo anno quandocumque
et cuiusvis temporis curriculo idem Petrus vel filii et heredes sui prenotatam
possessionem et possessionariam portionem suas cum prenotata quantitate pecunie
viginti marcarum latorum denariorum Vyennensium quamlibet marcam cum decem pensis
Vyennensibus computando coram capitulis scilicet Jauriensi vel Castriferrei
ecclesiarum redimere possint et valeant a Dominico bano vel eius filiis et posteris
ydemque Dominicus banus vel eius filii et heredes pro prenotate pecunie quantitate
viginti marcarum Vyennensium eidem Petro vel eius posteris resignare et remittere
tenebuntur absque aliquali pena dupli et vinculo gravaminis pecunie prenotate
ad que omnia premissa et premissorum singula eedem partes se coram nobis spontanea
eorum obligarunt voluntate. Datum in die festo Beatorum Symonis et Judee apostolorum
anno Domini Mmo CCCmo XLmo septimo.