[C]onventus monasterii Waradyensis universis Christi fidelibus presentibus pariter et futuris, presentes litteras inspecturis salutem in Domino sempiternam. Ad universorum tam presencium quam futurorum noticiam harum serie volumus pervenire, quod religiosus vir dominus Thomas, abbas monasterii de Cykador item frater Pytrolph sacerdos de conventu predicti monasterii de Cykador, pro se et pro ipso toto conventu iamdicti monasterii de Cykador, cum sufficientibus procuratorie litteris eiusdem conventus, coram nobis personaliter constituti propositum extitit per easdem oraculo vive vocis, quod cum predictum monasterium ipsorum de Cykador cum omnibus suis utilitatibus a sumpmo usque deorsum lamentabilibus olim fuisset per iustum, que devastacio in audibilis a tempore devastacionis gentis tartarice non fuisset et non extitisset auxiliator, qui suis anxietatibus seu paupertatibus caritativo opere conpatentur nisi eis magnificus vir magister Tuteus comes Pylisiensis et castellanus de Wyssegrad ac magister ianitorum domini nostri regis centum marcas compoti Budensis duodecim equos de equacia sua et unum equum emissarium vallentem plene et integre concessisset per cuius beneficii exhibicionis bravium predictum monasterium ipsorum cum omnibus suis utilitatibus, videlicet cum ambitu et aliis necessariis suis reparasent seu recuperassent ne ipsi tanti accepti transitii immores existerent ne eciam idem magister Tuteus tantarum dampna rerum suarum iam eisdem datarum et concessarum per eundem patentur pro eo ipsi habito unanimi consilio et pari tractatu iamdictorum fratrum suorum de conventu de Cykador quandam possessionem ipsorum Bukyd vocatam in comitatu Budrug existentem, sub terris metis et terminorum distinccionibus, prout in litteris privilegialibus domini Endre quondam illustris regis Hungarie beate recordacionis exinde confectis continetur, supradicto magistro Tuteus tum pro predicta sumpma pecunie quantitate tum eciam pro fidelitatibus et fidelium serviciorum meritis, quibus idem magister Tuteus a longo temporum curriculo in necessitatibus eorum, videlicet tam prosperis quam in adversis continuis locis et temporibus oportunis laudabiliter meruit conplacari et se reddere graciosum et per eum suis heredibus heredumque suorum inposterum successoribus vendidissent, tradidissent et contulissent ac vendiderunt et tradiderunt idem dominus Thomas abbas de Cykador et Pytrolph in suo et predicti conventus personis coram nobis iure perpetuo et irrevocabiliter possidendam tenendam pariter et habendam. In cuius rei memoriam perpetuamque firmitatem, presentes litteras nostras privilegiales cum apposicionem pedentis sigilli nostri munimine duximus roborandas litteras tamen privilegiales predicti domini Endre regis, quarum vigore seu firmitate eandem possessiem ipsi attenus tenuissent et possedissent eidem magistro Tuteus dederunt et assignaverunt coram nobis. Datum anno Domini Mo CCCo XLmo septimo, mense aprili. Fratre Othone decano, fratre Johanne cantore et fratre Petro custode existentibus, ceterisque fratribus una nobiscum iugiter Deo famulantibus et devote.