Conventus monasterii Waradyensis universis Christi fidelibus presentibus pariter et futuris presentes litteras inspecturis salutem in domino sempiternam. Ad universorum tam presencium quam futurorum noticiam harum serie volumus pervenire, quod Georgius filius Mychaelis de Kaiand coram nobis personaliter constitutus est confessus oraculo vive vocis, quod ipse quasdam duas possessiones suas Batur et Poth vocatas in comitatu de Budrug inmediate adiacententes et ipsum ut asserit iure hereditario attingentes, cum lapidea ecclesia in eadem Batur constructa, terris arabilibus, fenetis et aliis utilitatibus suis omnibus, magnifico viro magistro Tuteus filio magistri Emerici, comiti Pilisyensi, castellano de Wyssegrad et magistro ianitorum aule regie pro quatraginta marcis pecunie compoti Budensi, plene habitis et receptis ab eodem ut dicebat, vendidisset, tradidisset et assignasset, ac vendidit coram nobis, iure perpetuo et irrevocabiliter possidendas tenendas pariter et habendas in filios suorum ac heredes. In cuius rei memoriam et perpetuam firmitatem presentes litteras nostras privilegiales concessimus pendentis sigilli nostri munimine roboratas. Datum anno Domini Mo CCCo XLmo quinto, mense junio, fratre Paulo decano, fratre Nicolao custode et fratre Andrea cantore existentibus, ceterisque fratribus una nobiscum iugiter Deo famulantibus ac devote.