Nos conventus monasterii Waradyensis memorie commendamus per presentes, quod constitutis coram nobis personaliter viro discreto Bodor, presbitero capellano et procuratore nobilis viri magistri Tuteus filii magistri Emerici de Bechey cum sufficientis litteris procuratoriis pro eodem magistro Tuteus, domino suo ab una parte, item Nicolao filio Laurencii et Stephano filio Benedicti, fratribus patruelibus nobilibus videlicet de Lyppou ab altera. Idem Bodor presbiter est confessus oraculo vive vocis, quod prenominati Nicolaus et Stephanus de terra eorum hereditaria Monorosd vocata in comitatu de Baranya existente terram ad unum aratrum sufficientem, quam ipsi iuxta continenciam litterarum comitis capelle regie in presentibus octavis beati Mikaelis archangeli ipsi magistro Tuteus, presente homine nostro dare et assignare tenebantur, eidem magistro Tuteus novis metis et terminis ad possessiones eiusdem magistri Tuteus Izbold et Kostan convictam, adunatam et vallatam dedissent, assignassent atque tradidissent iure perpetuo et irrevocabiliter possidendam et habendam in filios suorum filiorum et heredes. Super quo eciam presentibus nobis reportatis nostrum privilegium concedemus. Datum secundo die octavis beati Mikaelis predicte, anno Domini Mo CCCo XXXo octavo.