Excellentissimo
domino suo Ladizlao dei gracia illustri regi Vngarie Conventus monasterii Waradiensis
oraciones in Domino tam debitas quam devotas. Litteras vestre reverentur ut
tenemur recepimus sub hac forma: (Itt következik IV. László király, Reg. Arp.
3048. számú oklevele.) Noverit igitur vestre dominacionis magnitudo, quod ad
eundem comitem Morianum in lecto egritudinis sue accubantem ad peticionem ipsius
per suum nuncium delatam, misimus unum ex nobis virum idoneum, coram quo idem
comes Morianus suum conderet testamentum. Qui postmodum ad nos rediens retulit,
quod coram ipso et in presencia duorum Fratrum Predicatorum qui ambo Petrus
et Petrus vocabantur, idem comes Morianus, eger quidem corpore, sed mentis sue
compos, inter cetera sui testamenti disposita seu ordinata, de possessionibus
suis tale testamentum condidisset, si tamen ipsum sine heredum solacio decedere
contigeret, quod possessiones suas, quas habet in comitatu de Barana, Jeneu
et Naney vocatas, cum omnibus utilitatibus suis et pertinenciis universis, reliquisset
consorti sue pro dote sua, rebus secum ablatis, quas ab ipsa per spoliaciones
receptas esse recitasset. Item filie sue reliquisset possessiones suas in comitatu
de Wolkou existentes, Zorwos, Warad et Touth vocatas, cum utilitatibus suis
et ad se pertinentibus. Item possessionem suam, quam in Eng habere dinoscitur,
reliquisset filie sororis sue cum suis pertinenciis universis. Item claustro
Sororum de Ordine Fratrum Predicatorum de Insula Sancte Marie Virginis, in quo
loco sepulturam sibi fieri elegit, reliquisset possessionem suam Anias vocatam,
quam habet iuxta Tisciam cum omnibus utilitatibus suis, piscinis videlicet,
et pertinenciis suis universis. Item reliquisset eidem ecclesie possessionem
suam, quam habet ultra Tisciam nomine Ykurholm cum omnibus pertinenciis suis.
Item quandam terram suam iuxta Tisciam Koxol vocatam reliquisset claustro sororum
supradicto. Alia autem, que de servis et ancillis suis ordinavit, continentur
in litteris testamenti sui in camera ecclesie nostre, quas litteras idem comes
Morianus sub suo et dictorum Fratrum Predicatorum sigillis nobis curavit destinare.
Datum tercio die medii XL-me.
Vissza
a listára