Nos, Conventus monasterii
Waradiensis, memorie commendantes, significamus universis, quibus expedit, per
presentes, quod comes Dama, cognatus magistri Conrardi filii Stephani pro eodem
magistro Conrardo ab une parte, comes Johannes filius Tanch ab altera, coram
nobis personaliter constituti, idem comes Dama confessus est viva voce, quod
cum idem magister Conrardus predictum comitem Johannem, pro quibusdam excessibus
suis captivasset, tamen ad preces multorum nobilium inclinatus eiusdem comitem
Johannem de captivitate remisisset, et idem comes Johannes presencialiter astando
obligavit se et assumpsit, quod quandocumque ab ipso magistro Conrardo recederet
infidelitatem vel alia nocumenta faciendo, vinee sue, site in Scilag, et in
Wersund, devolverentur in manus eiusdem magistri Conrardi perpetuo possidende,
et similiter vinea Egidii, cognati ipsius Johannis comitis, in Scylag existens,
cederet iuri magistri Conrardi memorati, prout per eundem Egidium, coram nobis
extitit obligatum. Item idem comes Dama, Elek, Johannes frater eiusdem, Isaak
de Hozugd, Andreas comes, frater Marcelli, comes Albertus de Perman, pro comite
Johanne supradicto, fideiussores extiterunt inhunc modum, quod si eundem comitem
Johannem, a predicto magistro Conrardo, discedere contingeret, sicut superius
est expressum, ipsi in solucione pecunie inferius expresse, tenerentur magistro
Conrardo supradicto, videlicet comes Dama, in tribus marcis, Elek in una marca,
et aliam marcam assumpsit solvere ex parte Jacobi de Hozugd, cognati sui. Item
Johannes frater ipsius Elek, in una marca. Isaak in una marca, Andreas comes
in una marca, et comes Albertus in tribus marcis. Item dixerunt, iidem comes
Dama, et alii fideiussores prenominati, quod Georgius comes filius Georgii,
de sancto Adriano, et Conrardus filius eiusdem, pro prefato comite Johanne fideiussores
in decem marcis extitissent. Datum anno Domini Mo CCo LXXo sexto.
Vissza
a listára