[C]onventus monasterii
Waradiensis, omnibus Christi fidelibus, presentes litteras inspecturis, salutem
in Domino sempiternam. Ad universorum notitiam tenore presencium volumus pervenire,
quod Stephanus filius Thome de Kaplan, omni solacio propinquorum destitutus
considerans, quod ea, que in mundo sagaci cursu considerantur elabi, non sunt
captanda, quin immo quemque fideli mente grata pietatis subsidia inpendendo
ad celestia debere anelare(!), coram nobis personaliter constitutus terram suam
hereditariam in Kaplan existentem, cum omnibus utilitatibus et pertinenciis
suis, videlicet cum terris arabilibus, feto(!), silva et duabus vineis, ob remedio(!)
anime sue monasterio perpetue Virginis Marie Bude in Insula constructo sive
existenti, nemine prohibente, libere ac spontanee relegavit sive contulit coram
nobis, hoc adiecto, quod quamdiu idem Stephanus cum sorore sua viverent, in
eadem terra, sub tutela ecclesie residerent, si autem predictum Stephanum ante
sororem divina vocatione, Ade debitum persolvere contigerit, ex ipsa terra secundum
consuetudinem regni quartam partem [a]ut valorem persolvent mulieri supradicte.
In cuius rei testimonium, ad petitionem partium, presentes contulimus litteras
sigilli nostri munimine roboratas. Datum XIIIo Kalendas Septembris, anno Domini
millesimo CCo septuagesimo quarto. Elya decano, Matheo cantore, Bonifacio custode
et Adriano cellario existentibus.