Conventus monasterii
Waradiensis, universis Christi fidelibus presentes litteras inspecturis, salutem
in Domino sempiternam. Ad universorum noticiam tenore presencium volumus pervenire,
quod nobilis domina filia Jous de genere nobilium apud ecclesiam Sancti Johannis
prope Okur existencium Tyna vocata, relicta Salomonis de genere Geg, nunc uxor
Chepani de villa Bagata ab una parte, Paulus filius Galli pro se et pro Oliuerio
filio suo, Michael filius Geg pro se et pro Salomone et Geg, fratribus suis
uterinis, Pangracius filius Emerici pro se et pro Andrea, fratre suo carnali
ab altera, coram nobis personaliter constituti, eadem domina proponens confessa
est viva voce, quod predicto Salomone marito suo, fratre ipsorum Galli et Emerici
de medio sublato, antequam eidem Chepano secundo marito suo nupta fuisset, ob
amorem et dileccionem predictorum nobilium de iuxta Okur, cum eisdem pio affectu
compateretur tamquam suis cognatis karissimis, ipsis, scilicet Paulo, Oliuerio
filio suo, Myhaeli, Salomoni et Geg fratribus eiusdem Mychaelis, Pangracio,
et Andree fratri eiusdem, superius nominatis nobilibus, et aliis cognatis eorundem,
dotem suam pure et simpliciter relaxasset, res vero parafernales suas eisdem
nobilibus sibi restituentibus plenarie recepisset, et ad desiderium sue salutis
distribuisset anime sue ob perpetuam suam elemosinam condonando, prout sue voluntati
videbitur expedire. Assumpmente ipsa domina, quod de cetero nec ipsa, nec predictus
Chepanus maritus suus, nec quispiam fratrum, cognatorum seu consanguineorum
suorum, ipsam dotem possint ulterius repetere, seu inposterum vendicare de predictis
nobilibus et de universis cognatis eorundem, et eosdem ac cognatos ipsorum nullatenus
valeant racione ipsius dotis impetere successu temporis, seu aliquatenus molestare.
In cuius rei testimonium perpetuamque firmitatem presentes litteras notras,
cum alphabeto intercisas concessimus sigilli nostri munimine roboratas. Datum
IIIIo Idus Aprilis, anno Domini Mo CCo septuagesimo IIIIo. Waltero decano, Petro
cantore, Bonifacio custode existentibus.