Conventus monasterii
Waradiensis, omnibus Christi fidelibus, presentibus et futuris, ad quos presentes
littere pervenerint, salutem in Domino sempiternam. Ad universorum noticiam
tenore presencium volumus pervenire, quod Mortunus, Odus et Stephanus filii
eiusdem, Isac, Abram, Jacobus, Johannes et Josephus filii Bud et Buck de villa
Odus personaliter ab una parte, comes Thomas de Narag, pro se et pro filiis
suis Blasio, Paulo et Ladislao vocatis et pro Itemerio filio Elie fratris sui
carnalis similiter personaliter ab altera, coram nobis constituti iidem Mortunus,
Odus et Stephanus et alii viri prenominati socii eorundem proponentes confessi
sunt viva voce, quod idem Thomas comes, pro se et pro filiis suis ac Itemerio
prenominatis movisset causam contra ipsos, et citasset eos, mediante Zoym de
genere Drusma homine domini regis, pro fundis curiarum et racione terre arabilis,
in eadem villa Odus existencium, ad curiam domini regis et ibi coram Stephano
viceiudice curie domini regis, inter partes diucius fuisset in figura iudicii
disceptatum, sicut in litteris eiusdem viceiudicis super processu ipsius negocii
confectis invenerimus contineri seriem cause inter partes ventillate. Tandem
de permissione eiusdem viceiudicis et de communi voluntate ipsam causam arbitrio
proborum virorum commisissent, qui, videlicet arbitrii, cum partibus predictis,
coram nobis personaliter constituti arbitrati sunt inter partes et iuxta arbitrium
ipsorum arbitrorum omni lite et accione sedata et sopita in forma pacis inter
partes sepedictas, iidem Mortunus et Odus ac alii viri prenominati terram in
longitudine ad octuaginta amplexus minus duobus amplexibus, et in latitudine
ad quadraginta amplexus similiter minus duobus sufficientem pro fundis curiarum,
in quaquidem terra Mortunus et Odus predicti per partes utrasque dicebantur
residere, et duodecim iugera terre arabilis in terra eidem (sic!) ville Odus
pertinenti, habens unum quodquod iugerum terre septuaginta amplexus in longitudine,
septem vero in latitudine, cum mensura regia, iuxta regni consuetudinem approbatam,
dederunt Thome comiti et filiis suis ac Itemerio prenominatis et per eos suis
heredibus heredumque suorum successoribus iure perpetuo et irrevocabiliter possidenda,
et habenda, dicendo tamen, quod ipsa terra pro fundis curiarum et in terra arabili
data prefato Thome comiti et suis filiis ac Itemerio memoratis fuisset terre
ipsius Thoma comitis et filiorum suorum ac Itemerii prefatorum, hereditaria,
sed a spacio decem annorum alienata fuisset ab eidem (sic!) assumentes insuper
et obligantes prenominati Mortunus, Odus et Stephanus et alii socii eorundem
se ultronea voluntate ad hoc quod de cetero nec ipsi nec quispiam filiorum seu
cognatorum suorum contra ipsos Thomam comitem et filios eiusdem ac Itemerium
racione terrarum predictarum litem et quescionem possint sciscitare, immo pocius
si aliqua quescio pro ipsis terris contra comitem prenominatum vel suos filios
aut Itemerium prenotatos per quemcumque modum emergeret, ipsi Mortunus et Odus
ac alii socii ipsorum prenominati tenerentur eosdem ab ipsa quescione expedire
et salvare proprio labore et expensa. Assumpserunt eciam viri prenominati, quod
quandocumque dictus Thomas comes vel sui filii aut Itemerius prenominati propter
maiorem cautelam et firmitatem presentis nostri privilegii, privilegium domini
regis habere voluerint, sepenominati viri in curiam domini regis accedere tenebuntur
et responsiones et asserciones eorum prehabitas debent recitare, quod privilegium
domini regis ipsi Thome comiti et suis filiis ac Itemerio prescriptis concedatur.
In cuius rei testimonium, ad peticionem partis utriusque, presentes dedimus
sigilli nostri munimine roboratas. Datum primo die mensis Januarii, anno Domini
Mo CCo septuagesimo. Valtero decano, Petro cantore, Bonifacio custode existentibus.