Beatus, divina
miseracione abbas Waradiensis et Conventus eiusdem loci, universis Christi fidelibus,
presentibus et futuris, salutem in omnium salutare. Quoniam ea, que hic aguntur
per emergentem calumpniam seu oblivionem solent sepius irritari, vivaci litterarum
testimonio debent confirmari. Hinc est igitur, quod ad universorum noticiam
harum serie volumus pervenire, quod Joanka filius Johannis de villa Nadaycha
ad nos accedens, paupertatem suam, qua volente Deo, obpressus erat, nobis allegavit
petens humiliter, ut vineam suam, quam supra dictam villam Naydaycha, iuxta
Jacobum, Egidium et Bozouch habebat, vendere posset de nostra voluntate ut inopiam
et paupertatem, quam paciebatur, exinde reformaret. Nos igitur miseria moti
precibus eius condescendentes, de consilio omnium iobagionum nostrorum, eidem
licenciam dedimus, ut ipsam vineam, cui vellet, posset vendere libere et secure.
Igitur dictus Joanka secundo ad nos rediens dixit et proposuit, quod nominatam
vineam Symiano, civi de Zekchu et suis heredibus heredumque suorum successoribus,
pro quinque marcis argenti minus fertone, vendidisset in perpetuum possidendam,
ipsamque sumpmam pecunie sepedictus Joanka, plenarie ab eodem recepit coram
nobis. Ut autem huius vendicionis et empcionis series, robur perpetue firmitatis
obtineat, et ne ullisumquam nostris successorum que nostrorum temporibus, in
irritum possit revocari, presentes, alphabeto incisas, sigillorum nostrorum
munimine dicto Symiano dedimus roboratas. Anno Domini Mo CCo quinquagesimo nono.
Adam decano, Macharia custode, Renerio cantore, Farcasio cellario, Romanya maiore,
Georgio minore comitibus existentibus.