Nos conventus
monasterii Waradiensis memorie commendantes significamus quibus expedit per
presentes universis, quod viris honorabilibus domino Yurkone preposito ecclesie
Quinqueecclesiensis, Tristano cantore, Theodero custode et Vencezlao decano,
de capitulo dicte ecclesie Quinqueecclesiensis, pro se et pro toto capitulo
eiusdem ecclesie Quinqueecclesiensis cum procuratoriis litteris ipsius capituli
ab una parte, item nobilibus dominabus Pynne et Ilana vocatis, filiabus Nicolai
filii Vid, de Janus, sororibus videlicet carnalibus, Vydol filii predicti Nicolai
unacum eodem Vydol fratre carnali ab altera, in nostri presencia personaliter
constitutis, relatum extitit per eosdem oraculo vive vocis, quod licet in facto
vendicionis et empcionis terre hereditarie prenominati Vydol Janus vocate, in
terra Janus ipsum Vydol iure hereditario contingentis, quam predictus Vydol
dicto capitulo Quinqueecclesiensi vendere, et ipsum capitulum ab eodem Vydol
emere intendebant, prenominate nobiles domine Pynne et Ilana vocate, racione
quarte earum, ab eadem terra Vydol carnalis fratris ipsorum, Janus vocata eisdem
nobilibus dominabus de iure provenientis, dictum Vydol a vendicione et memoratum
capitulum ab empcione dicte terre prohibuissent contradicendo, et contradixissent
prohibendo. Nichilominus
tamen super facto ipsius terre comitibus Cristophoro filio Angelus, et Pedur
de parte capituli predicti, item comitibus Achille et Fulkus pro parte dominarum
predictarum, componentibus inter partes propter bonum pacis ipse partes taliter
concordassent, et concordaverunt coram nobis, quod quia predictus dominus prepositus
Quinqueecclesiensis et alii socii sui prenominati de capitulo suo, et predicti
tocius capituli Quinqueecclesiensis nomine, ut eandem terram Vydol Janus vocatam
prefate nobiles domine, eidem Vydol ad vendendum, ipsi capitulo, et ipsum capitulum
ad emendum ab eodem Vydol pacifice permittant, quartam partem terre ipsius Vydol
Janus vocate, ab Oriente existente, a parte scilicet alterius terre hereditarie
ipsius Vydol similiter Janus vocate, quam idem Vydol comiti Achilli dinoscitur
vendidisse, situatam, cuius quidem quarte partis terre Janus termini seu distincciones
terminorum sicut partes viva voce nobis recitarunt: incipiunt super duabus arboribus
illicum, a parte Septemtrionali, scilicet a parte silve Bothyan situatis, de
quibus per Gudur egreditur versus Meridiem et descenditur ad pontem in medio
ville Janus existentem, ubi transita palude per ipsum pontem versus Meridiem
cadit in viam, per quam eundo versus Meridiem ibi descenditur ad unam paludem
Pothk dictam, per medium Farkaslyk effluentem Wokousede vocatam in transita
palude Potok dicta, per viam versus Meridiem, venitur ad metas ville Complor,
que est ecclesie nostre Waradyensis. Inde cuiusdam iuxta angulum silve in commetaneitate
terre ecclesie nostre flectitur versus Occidentem, et pervenitur ad tres arbores
quercuum. Inde reflectitur versus Septemtrionem et descendit ad paludem super
qua est vetus locus molendini, abhinc ascendit per Hurh versus Septemtrionem,
et cadit in viam per quam itur in Bothyan et per ipsam viam eundo versus Septemtrionem
revertitur ad predictas duas arbores illicum, a quibus primitus est inceptum
et ibi terminatur, concessissent dari et assignari, per predictum Vydol memoratis
duabus nobilis dominabus sororibus suis pro quarta earundem, quam eciam quartam
partem terre Janus, dictus Vydol ipsis dominabus soroibus suis pro quarta earundem
coram nobis dedit et assignavit in perpetuum et irrevocabiliter possidendam.
Ideo ipse nobiles domine residuas tres partes terre ipsius Vydol Janus vocate,
ad vendendas eidem, dicto capitulo et ipsum capitulum ad emendas, ab eodem libere
permisissent, ex earum benivolo assensu, et consensu, super quo eciam presentibus
nobis reportatis, nostrum privilegium sepedictis nobilibus concendetur. Datum
tercio die nativitatis Beate Virginis, anno Domini Mo CCo quinquagesimo sexto.