Capitulum ecclesie beati Petri de Posaga omnibus Christi fidelibus presentes litteras inspecturis salutem in domino sempiternam. Ad universorum notitiam tenore presentium volumus pervenire, quod anno domini MoCCCoXLo tercio, sabbato proximo ante octavas festi purificationis beate virginis, nobilis vir magister Leukus filius Petri de Wrbua ad nostram personaliter accedendo presentiam exhibuit nobis quasdam litteras nostras patentes in facto possessionarie emptionis, quondam portionis Benche filii Thuchen in possessione Prydissinch vocata existentis confectas, petens nos humili precum cum instancia, ut ipsas litteras nostras et totam formam earundem de verbo ad verbum transcribi et in formam nostri privilegii redigy(!) facere dignaremur. Quarum scilicet litterarum nostrarum patencium tenor talis est: ***. Nos igitur justis et legitimis ac condignis peticionibus prefati magistri Leukus filii Petri et justicia annuentes, ipsas litteras nostras non abrasas non cancellatas nec in aliqua sui parte viciatas, de verbo ad verbum, totamque formam earundem presenti nostro privilegio inseri fecimus transcribendo. In cuius rei testimonium presentes litteras nostras concessimus sigilli nostri munimine roboratas. Datum die et anno domini supradictis.