Excellentissimo domino suo domino Karolo dei gratia inclito regi Hungarie capitulum ecclesie beati Petri de Posaga orationes in domino debitas et devotas. Receptis litteris patentibus vestre magnitudinis venerabili in Christo patri domino Ladizlao dei et apostolice sedis gratia episcopo Zagrabiensi et ecclesie seu capitulo eiusdem ad citaciones, inquisitiones et ad quelibet alia negotia eorum, que in talibus processibus secundum regni consuetudinem fieri consueverunt, servato juris ordine peragenda per anni circulum concessis, juxta formam et continentiam earundem cum Vizlau(!) filio Gregorii de Vizlou homine vestro nostrum hominem discretum virum magistrum Petrum cantorem ecclesie nostre ad sciendum et inquirendum infrascripta pro testimonio transmisimus, qui postmodum ad nos reversi nobis concorditer retulerunt, quod prout idem Vizlou homo vestre excellentie presente dicto testimonio nostro a vicinis et commetaneis, nobilibus et aliis libere condicionis hominibus, clericis et laicis, a quibus decuit et licuit diligenter inquirendo scire potuisset, scivisset, quod feria quinta proxima post festum beati Luce ewangeliste Michael et Gregorius filii Mixa, Wlkou et Chernech filii Martini de sancta Cruce in comitatu de Iwang(!), coram homine vestro oraculo vive vocis confessi extitissent, quod possessio, qua circa ecclesiam sancte Crucis in predicto comitatu de Iwangh existens, quam predicti filii Mixa et filii Martini possidebant, nec ipsorum nec quorumcumque suorum proximorum aliquo jure condecenti extitisset, sed ipsa possessio castrensis et ad cellarium domini episcopi Zagrabiensis pertinens superfuisset, et sic ipsam possessionem ad manus iamdicti domini episcopi pure et simpliciter ac spontane resignarunt. Obligantes se nichilominus, quod si in processu temporis Michael et Gregorius filii Mixa item Wlkou et Chernech filii Martini vel ipsorum heredes ratione eiusdem possessionis in judicio vel extra judicium aliquam materiam questionis suscitaverint, penam eorum homicidii ipsi domino episcopo vel suis successoribus persolvere absque litis strepitu tenebuntur. Datum feria sexta proxima post festum beate Lucie virginis, anno domini M CCC XXXo nono.