Excellentissimo domino suo Karolo dei gratia inclito regi Ungarie capitulum ecclesie beati Petri de Posaga orationes in domino debitas et devotas. Receptis litteris patentibus vestre magnitudinis venerabili in Christo patri domino Ladizlao dei et apostolice sedis gratia episcopo Zagrabiensi et ecclesie seu capitulo eiusdem ad citationes, inquisitiones et ad quelibet alia negotia sua, que in talibus processibus secundum regni consuetudinem fieri consueverunt, servato juris ordine peragenda per anni circulum concessis, juxta formam et continentiam earundem cum Vyzlou filio Gregorii de Vyzlou homine vestre excellentie nostrum hominem discretum virum magistrum Petrum cantorem ecclesie nostre et faciendum et inquriendum infrascripta pro testimonio transmisimus, qui postmodum ad nos reversi nobis concorditer retulerunt, quod prout idem Vyzlou homo vestre serenitatis presente dicto testimonio nostro a vicinis et commetaneis nobilibus et aliis libere condicionis hominibus, clericis et laicis diligenter inquirendo scire potuisset, scivisset, quod Paulus filius Isou quondam predialis domini episcopi Zagrabiensis coram eodem homine vestro confessus viva voce extitisset, quod possessio, in qua parentes sui residebant, scilicet Grabroycha vocata in comitatu Chasmensi existens, in qua etiam ipse solus residebat, non fuisset eorum hereditaria, set fuit semper terre Chasmensis et ad celarium episcopi Zagrabiensis pertinens, nec in eadem qui(d)cumque juris ipse vel dicti sui parentes ullo umquam tempore habuissent, et sic ipsam possessionem ipsi domino episcopo pacifice resignasset, promittens et obligans se, quod si in processu temporis querelam aut qualemcumque questionis materiam coram quovis judice vel extra judicium suscitaverit, extunc absque litis strepitu penam sui homicidii eidem domino episcopo et sui heredes solvere teneantur. Datum feria sexta proxima post festum beate Lucie virginis, anno domini millesimo CCC XXXo nono.