Nos capitulum ecclesie beati Petri de Posoga memorie commendamus per presentes,
quod anno domini MCCCXXXo sexto, sabbato proximo post festum beati Petri apostoli
ad vincula, venerabilis in Christo pater dominus Ladizlaus dei et apostolice sedis
gratia episcopus Zagrabiensis per discretum virum magistrum Petrum cantorem ecclesie
nostre per nos juxta formam et continentiam litterarum regalium ad sciendum et
inquirendum de universis injuriis, controversiis et turbacionibus ipsi domino
episcopo indebite irrogatis, una cum Gunter homine regio destinatum, nec non per
eundem Gunter hominem regium quasdam litteras suas sub suo sigillo super facto
negotii et processus privationis possessionum Laurencii quondam comitis Chasmensis,
Johannis et Dominici filiorum Marcelli, nec non Gergus filii Alexandri pro eorum
excessibus contra eosdem patenter confectas nobis fecit exhiberi petendo, ut formam
earundem litterarum suarum patencium ob maiorem cautelam nostris, litteris patentibus
inseri faceremus. Nos vero petitionibus eiusdem domini episcopi justis et legittimis
annuentes pro eo etiam maxime, quia predictus magister Petrus cantor ecclesie
nostre et Gunter homo regius prenotatus eo tempore quo super facto inquisitionis
negotii et processus memorati in illis partibus processissent, ab omnibus nobilibus
et aliis communibus hominibus prefate ecclesie Zagrabiensis, a quibus decuit et
licuit diligenter inquirendo se scivisse dixerunt omnia eodem modo fuisse facta
et peracta, quemadmodum in predictis litteris ipsius domini episcopi continentur,
per hoc etiam certitudo huiusmodi sinistri facti evidencius comprobatur, quod
iidem Gunter homo regius et Petrus cantor congregationi Chasme habita(!) interfuerunt,
in qua, ut asserunt omnes prediales aliique homines trium provinciarum, scilicet
Chasmensis de Iwangh et de Dombro Johannem et Dominicum filios Marcelli ac Laurencium
quondam comitem Chasmensem, nec non Gergus filium Alexandri clamorosis vocibus
unanimiter in omnibus articulis in litteris domini episcopi contentis reos, culpabiles,
noxios et infidelitatis nota respersos seu cauterizatos domino episcopo tradiderunt,
tenorem earundem litterarum suarum presentibus nostris litteris inseri fecimus
de verbo ad verbum transcribendo, qui talis est:
Vissza
a listára