(C)apitulum ecclesie
Albensis omnibus Christi fidelibus presentes litteras inspecturis salutem in domino
sempiternam. Ad universorum notitiam tenore presentium volumus pervenire, quod
Karolus filius Nicolai pro se et Nicolao ac Michaele necnon Clara filia sua cum
legitimo procuratore capituli ecclesie beati Petri de Posaga, item Georgius filius
Ambrosii pro se et nobili domina Anicha vocata consorte sua ac Petro filio Jacobi
similiter cum procuratoriis litteris eiusdem capituli de Posaga ab una parte,
et Emericus filius Aladari de eodem comitatu de Posaga ex altera coram nobis personaliter
constituti, propositum extitit per eosdem viva voce et relatum, quod ipsi amicabili
compositionem proborum virorum interveniente, ut fraternali dilectione invicem
perfruantur, talem inter se ordinationem fecissent et commutationem, quod quia
prefatis nobilibus et dominabus a predicto Emerico quarta filialis cedere deberet,
idem Emericus quandam particulam possessionis sue in possessione Arpatorlo vocate
in comitatu Sirimiensi existenti habitam, ipsam legitime et de jure nullo contradicente,
prefatis Karulo et Nicolao ac Michaeli filiis suis ac domine Clare necnon Georgio
filio Ambrosii et eius consorti, item Jacobo filio Petri et ipsorum ac ipsarum
heredibus perpetuasset et perpetuavit coram nobis, et insuper quinquaginta marcas
promptorum denariorum, sicut predicti nobiles et procuratores dixerunt, eisdem
persolvisset Emericus prenotatus. Iidem vero nobiles et domine supradicte portiones
ipsorum totales in possessione Kondro et aliis quibusvis possessionibus ipsius
magistri Emerici eis qualitercunque provenientes, ipsi magistro Emerico filio
Aladari et eius heredibus heredumque suorum successoribus dederunt et contulerunt
perpetuo possidendas, tenendas pariter et habendas, totum jus totamque proprietatem
et dominium eorum ab ipsis possessionibus excipiendo, et cuicunque idem magister
Emericus legare vel condonare ipsas possessiones voluerit, liberam et securam
haberet facultatem, tali vinculo mediante, quod si prefatum Emericum vel suos
successores vel cui ipse condonaret ratione prefatarum possessionum, ipsi vel
ipsorum aut ipsarum heredes infestare attemptarent temporis in processu, tanquam
sopite litis suscitatores convincerentur ipso facto. Datum feria secunda proxima
post festum passce domini, anno eiusdem Mo.CCCo.XXo tercio.
Vissza
a listára