Nos Laurencius prepositus
ecclesie beati petri de Posega memorie commendantes significamus quibus expedit
universis, quod nobilis domina relicta magistri Petri filii magistri dominici
filia comitis Ladislai nunc consors magistri Thome filii comitis Benedicti, semel
et secundo, per hominem suum a nobis postulavit, ut duos ex concanonicis eiusdem
ecclesie nostre vel tres personas idoneas, ad audiendas asserciones suas mitteremus.
Nos igitur ipsius domine justis et honestis peticionibus ac congruis inclinati
ut tenemur justicia mediante, viros discretos Michaelem cantorem ecclesie nostre
nominate, ac Stephanum magistros. Concanonicos nostros duximus ad id destinandum.
Quiquidem demum ad nos reversi nobis dixerunt, quod ipsa domina portionem de dote
et rebus suis parafernalibus, a magistro Stephano filio predicti magistri dominici
quondam palatini provenientem, exceptis portionibus solucionis, quibus alii filii
ipsius magistri dominici sibi tenerentur, ob sumpmum titulum reverentie, quem
circa ipsam dominam honoranter ingessisset, sincero cordis desiderio ipsi magistro
Stephano dimisisset et relaxasset, ita quod nullo unquam tempore, ipsa solutione
portionis, ex ipsa dote et rebus parafernalibus predicte domine devenientis, quam
idem magister Stephanus solvere teneretur, erit soluturus. Datum in festo beati
Luce evangeliste. Anno domini Mo CCCo octavo.
Vissza
a listára