(C)apitulum ecclesie
beati Petri de Posoga(!) omnibus Christi fidelibus presentibus pariter et futuris
salutem in domino dominorum. Ad universorum notitiam harum serie volumus pervenire,
quod Zagrab minor et Zagrab maior filii Zagrab pro se et pro Ladizlao fratre ipsorum
ad nostram presentiam personaliter accedendo, nobis dixerunt protestando, quod
quedam privilegia ipsorum super possessionibus eorundem sub nostro antiquo et
novo sigillo confecta apud fratres minores in villa Posogavar ad claustrum sancti
Demetrii martiris degentes in sacristario eorundem per ipsos recondita extitissent,
que quidem privilegia per cremationem seu combustionem dicte ecclesie sancti Demetrii
combusta, annullata fuissent et cremata, cuius ecclesie combustio cunctis cernentibus
liquide claret et apparet, petebant itaque nos diligenti cum favore, quatenus
paribus ipsorum privilegiorum amissorum, que more et consuetudine aliorum capitulorum
in sacristario nostro solent reservari, requisitis et reinventis tenorum(!) eorundem
denuo et de novo transcribi faceremus, ne per annullationem seu combustionem iamdictorum
privilegiorum suorum periculum vel detrimentum seu alienationem possessionum ipsorum
paterentur. Quorum dignis et congruis peticionibus obtemperare cupientes in hac
parte, pari voto et comuni consilio in cameram nostram intravimus et scriniis
seu cistis nostris apertis, in quibus instrumenta seu privilegia universorum nobilium
et aliorum plurimorum servabantur, privilegia ipsorum Zagrab et Zagrab, inter
que invenimus quoddam privilegium eorundem sub antiquo nostro sigillo continens
hunc tenorem: Nos igitur pari ipsius privilegii invento et tenore perlecto eiusque
vigore plenius intellecto consideravimus ipsum esse nostrum verum privilegium
absque scrupulo alicuius nequitie confectum continensque communem justiciam, de
verbo ad verbum transscribi faciendo presentibus inseri fecimus et patrocinio
nostri sigilli novi communiri. Datum per manus magistri lectoris Demetrii ecclesie
nostre in festo beati Clementis pape, anno domini millesimo CCCo quinto.
Vissza
a listára