Excellenti domine
sue Th(omasine) [Th.] matri Andree dei gratia illustris regis Ungarie, ducisse
tocius Sclavonie et gubernatrici partium Citradanubialium usque mare, capitulum
beati Petri de Posagha orationes in domino. Litteras vestre magnificentie reverenter
recepimus in hec verba: Nos itaque mandatis et preceptis vestre excellencie satisfacere
ex debito et ex voto cupientes, ut tenemur, cum eodem Laurencio homine vestro
unum ex nobis virum idoneum ad premissa diligenter exequendum transmisimus, qui
quidem homo vester et noster demum ad nos redeuntes nobis retulerunt viva voce,
quod sicut ipsi per clandestinam et publicam inquisitionem factam a viris nobilibus
et comprovincialibus et aliis communibus hominibus certo certius scire potuerunt,
predictus comes Demetrius dominica die prenotata veniendo, possessionem iam dictorum
filiorum Lamperti Tulman vocatam, bonis omnibus mobilibus et per se moventibus
indebite destruendo spoliassent(!) [spoliassent], viros et mulieres, virgines
et viduas [vidnas] in eadem possessione commorantes denudando, miserabiliter contra
deum et eius justiciam detrectando, fruges eorum equis spargendo et residuas asportando,
et capillos unius jobagionis sui demecendo. Quas quidem spoliationes virginum
et viduarum et [ac] capillorum jobagionis ipsorum dissipationem idem homo vester
et noster vidisse sunt confessi, et adhuc descensus ipsius comitis Demetrii in
eadem possessione reliquisse affirmarunt. Nichilominus feria quinta proxima ante
festum sancti Martini citasset oculo ad oculum in ipsa possessione comitem Demetrium,
Michaelem filium Dominici, Johannem Kopoz dictum, item Petrum, Nicolaum filium
Bala, et alium filium Cheng, item ex servientibus magistri Laurencii Bencencium
de Bencench, Jacobum Juoph [Zuoph] dictum, Johannem nepotem Tarcha in vestre magnitudinis
presentiam comparendi, terciam feriam proximam post festum sancti Briccii confessoris
pro termino assignando. Datum in festo sancti Briccii confessoris.
Vissza
a listára