Capitulum ecclesie beati Petri de Posoga omnibus Christi fidelibus tam presentibus quam futuris salutem in domino sempiternam. Ad universorum notitiam harum serie volumus pervenire, quod comes Gyleth ad nostram personaliter accedendo presentiam confessus est oraculo vive vocis, quod ipse quandam possessionem suam Zauarsya vocatam intra metas possessionis Ezech nuncupate existentem metis et terminis infrascriptis circumdatam cum terris arabilibus, vineis, fenetis et silvis ac aliis utilitatibus suis universis Ipolito officiali suo pro morte seu homicido Peronii fratris predicti Ipoliti per ipsum comitem Gyletum, ut asseruit, casualiter interempti, et insuper pro meritoriis fidelibus serviciis eorundem Peronii videlicet et Ipoliti dedisset, donasset et contulisset, imo dedit, donavit et contulit serie presentium coram nobis heredum per heredes perpetuo et irrevocabiliter possidendam tenendam et habendam ex consensu, bone voluntate et permissione filiorum suorum similiter personaliter astancium coram nobis; et si aliquis eundem Ipolitum et heredes suos nomine prescripte possesionis Zauarsya vocate vel pertinentiarum suarum processu temporum ordine judicario impediret vel impedire attemptaret, iidem Gyleth et filii sui ac heredes ipsorum tenebuntur expedire et defendere ac in eadem possessione Zauarsya pacifice et indempniter conservare propriis laboribus et expenis, qui si expedire et defensare non possent vel non curarent, extunc aliam possessionem eorum similem huic qualitate, quantitate et valore in eodem comitatu de Posoga habitam, quam idem Ipolitus et sui heredes voluerint, ipsi Ipolito et suis heredibus dare et assignare tenebuntur similiter in heredum heredes possidendam sine dilatione et occasione aliquali. Cuius scilicet possessionis Zauarsya vocate, (sic)ut idem comes Gyleth asseruit, mete hoc ordine distinguntur: Prima meta incipit iuxta aquam Oryaua dictam ubi est arbor zyl, inde vertitur ad orientem et per fluvium dicti Oryaue vadit et pervenit ubi quidam rivulus Ezech patak dictus cadit in Oryauam, inde vergitur ad meridionalem et per eundem rivulum Ezech patak dictum vadit et pervenit prope quandam villam Gurbunyk vocatam, ubi est meta terrea, inde vertitur versus occidentem et per eundem rivulum vadit et pervenit ad quandam viam, qua via vadit ultra rivulum, inde vadit per eundem rivulum et pervenit prope quedam fenilia, inde vadit iuxta predicta fenilia per eundem rivulum et pervenit ad quandam viam ubi est meta terrea, inde vertitur ad aquilonem et per eandem viam iuxta predicta fenilia vadit et pervenit ad quandam viam et vadit ultra viam et per eandem viam ascendit ad quendam montem Belnikelnik vocatum, inde vertitur ad orientem et per berch iuxta nemus vadit et pervenit ad quendam montem ubi est meta terrea, inde vertitur ad aquilonem et per nemus descendit ad alium montem ubi est meta terrea, inde per nemus descendit ad quandam magnam viam ubi est meta terrea, inde vadit ultra magnam viam et per quandam semitam vadit et pervenit ad priorem metam et ibi terminatur. In cuius rei memoriam firmitatemque perpetuam presentes concessimus litteras nostri sigilli pendentis munimine roboratas. Datum in vigilia beatorum Petri et Pauli apostolorum, anno domini millesimo ducentesimo nonagesimo.

Vissza a listára