Capitulum ecclesie sancti Petri de Posaga omnibus Christi fidelibus tam presentibus
quam futuris salutem in domino sempiternam. Ad universorum noticiam harum serie
volumus pervenire, quod Dragos et Zule filii Dragozlai, pro se et pro Mich(aele)
fratre ipsorum ab una parte, Mortun(us) filius Bosan ab altera coram nobis sunt
constituti, et iidem Dragos et Zule confessi sunt viva voce, quod quandam particulam
terre ipsorum hereditarie in Predysynch adjacentem supradicto Mortun pro tribus
marcis plene receptis vendidissent in heredum heredes perpetuo possidendam. Mete
autem ipsius terre, sicut iidem nobis retulerunt, hoc ordine distinguntur: Prima
meta incipit a Kasnyk potoka tendens versus orientem ad arborem piri, inde tendit
versus meridiem per berch et ascendit ad arborem tilie, sub qua est meta terrea,
inde ad arborem borcolcha que est in medio berch in fine vinee, inde descendit
inter vineas filiorum Chep(ur)na ad magnam viam; inde per eandem viam tendit in
bono spacio et exit de via et pervenit ad quandam siccam vallem et per ipsam vallem
cadit in quendam potok et transito ipso potok asscendit ad arborem byk, sub qua
est meta terrea que est sub vinea Symonis; inde asscendit juxta Myrozlawteluke
et pervenit ad arborem berekun que est juxta terram Dansa, cadit in magnam viam
et per eandem tendit versus occidentem et exiendo de via versus septemtrionem
cadit in Kasnyk potoka supradictum. In cuius rei memoriam firmitatemque perpetuam
presentes concessimus litteras sigilli nostri munimine roborando. Datum anno domini
Mo CCo LXXo nono.
Vissza
a listára