Universum capitulum ecclesie sancti Petri de Posoga omnibus Christi fidelibus
presentem paginam inspecturis salutem in omnibus salvatore. Quoniam labilis est
humana memoria et rerum turbe non sufficit, ob hoc ratio mater equitatis adinvenit,
ut res geste litterarum debeant vivacitate perhennari. Hinc est, quod ad universorum
noticiam volumus pervenire, quod constituti coram nobis nobiles viri de genere
Borych bani, videlicet Marczel, Michael, Wysen et Wydus filii Benedicti ab una
parte, et Beryzlaus filius Beryzlaui ex altera, viva voce et amicabili personaliter
affirmarunt: quod quamquam diu et multociens super divisione ipsorum generali
lites et contentiones in alterutrum coram domino rege et diversis judicibus regni
fuissent ventilate, tandem probis viris et idoneis inter ipsos pacem et compositionem
de voluntate partium iam dictarum facientibus, scilicet Petri filii Otholyn, Johannis
fratris eiusdem, Georgii filii Mutimerii, Nicolai filii Descysclow, Simonis filii
Byrizlo [Gyrizlo], Pauli filii Boryho, Gregorii filii Zawda, Stephani filii Jacow,
Syrgerardi comitis et Thome filii Comelij, ut discordia et lites de medio eorundem
penitus tollerentur et sopirentur in hunc modum convenissent, ut medietas silve
inter aquam Moruzna vocatam et aquam Zawa existentis in solitis proventibus, scilicet
in pastu porcorum et omnibus utilitatibus quas eadem silva consuevit pro tempore
ministrare in duas partes debet sine diminucione bipartiri. Similiter etiam medietas
ipsius aque Moruzna ab initio eiusdem que Fok vulgariter appellatur secundum cursum
eiusdem aque in lausulis(!), que vulgo scege nuncupantur, partibus communiter
ministrabit. Ut autem premissa ordinatio inter nobiles prevotatos [prenotatos]
robur obtineat perpetue firmitatis, ad peticionem eorundem presentes litteras
concessimus nostri sigilli impressione roborantes. Datum anno gracie millesimo
ducentesimo septuagesimo secundo.
Vissza
a listára