Capitulum Ecclesie Beati Petri de Posaga universis Christi fidelibus tam presentibus
quam futuris salutem et pacem in Domino sempiternam. Gesta temporalium litteralia
[litterali] memorie solent commendari, ne processu temporum certa possint dubiis
commutari. Universitatis vestre devotioni tenore presentium duximus insinuandum:
quod Nycholaus filius Dezyzlay ab una parte, et Mathyas frater Zauyde de genere
Borych bani ab alia constituti coram nobis, tale concambium inter se protulerunt
ordinasse; quod prefatus Mathyas frater Zauide quandam terram suam nomine Podwrs,
vicinam et conterminam terre antedicti Nycholai, dederit et statuerit eidem Nycholao
tam sibi ipsi, quam suis successoribus in perpetuum possidendam. Memorata autem
terra Podwrs talibus existit metis circumscripta; cuius prima meta incipit ab
oriente a quodam fluvio nomine Hodal iuxta terram Nicholai, et vadit per unam
magnam viam versus occidentem, et incidit in fluvium nomine Lezkoa; et per eundem
fluvium ascendit versus aquilonem, et in ascensu per eundem fluvium pervenit ad
duas metas ad quoddam berch; et ab hiisdem metis prope transit unam viam, et devenit
ad unam metam; et ab illa meta descendit per directum ad vallem in fluvium nomine
Zqworch; et per ipsum fluvium reflectitur et tendit versus orientem, et eundo
per illum eundem fluvium supra mansionem Wolkaz [Wolkar] exit ad arbores duorum
cerasorum declinans versus meridiem; et exinde vadit ad unum berch in quoddam
virgultum, sub quo est una meta; et deinde descendit in rivum nomine Dolboka,
[Doboka] et deinceps per eundem rivum ipsa terra Podwrs est contigua et contermina
terre sepedicti Nicholai, et sic terminatur. E converso autem idem Nicholaus quandam
[quondam] terram suam nomine Proucha, vicinam et conterminam terre Mathie supradicti
eidem Mathie in concambium terre pretaxate dixit se dedisse similiter tam sibi
ipsi, quam suis successoribus in perpetuum possidendam; cuius terre mete per circuitum
sunt tales. Prima meta incipit a terra ipsius Mathie in fluvio Proucha ab uno
littore, et vadit per unam viam versus orientem [orientalem] usque ad aliam viam
sed [s(cilic)et] veterem, que declinat versus meridiem, et ibi in commetaneitate
cum terra Mathie tendit ad unum puteum; et exinde vadit versus occidentem ad litus,
quod est in predicto fluvio Proucha, et ibi est meta; et ab eodem littore per
ipsum fluvium terra Proucha existens commetanea terre Mathie sepedicti redit ad
locum littoris in inicio nominati. Insuper autem idem Nicholaus pro equipollencia
concambii addidit Mathie sepius nominato decem et novem marcas. Ut autem huius
concambii series perpetue firmitatis robur obtineat, nec umquam [unquam] (ab)
aliquo [temporum] valeat in dubium revocari, presentes litteras ad peticionem
partium concessimus nostri sigilli munimine roboratas, anno gracie M. CC. LX.
quarto.
Vissza
a listára