Capitulum Ecclesie Beati Petri de Posaga omnibus presentem paginam inspecturis
salutem in Domino sempiternam. Ad universorum noticiam harum serie volumus pervenire,
quod accedens ad nostram presentiam Bylota terram tenens filius Bolk ex una
parte, ex altera vero Demetrius filius Predrag, Dragota filius Dragan terram
tenentes, in nostra presentia astiterunt. Idem Bylota confessus est, se coram
nobis terram quandam suam Lusan nuncupatam precio comparatam de Wulkota jobagione
Castri nostro testimonio mediante, quam terram idem Wulcota ante adventum Tartarorum
optinuerat, ex consensu Bele fratris sui et voluntate Wulcota supradicti, Demetrio
et Dragota supradictis vendidisse pro triginta tribus pensis ad compotum frisaticorum
in argento, equis et bobus, coram nobis integraliter persolutis, imperpetuum
pacifice possidendam. Cuius terre processus talis est, quod incipit ab Oriaua
de terra Remunt versus aquilonem, et abinde tendit in sicca valle ad silvam,
que sicca vallis est pro meta supradictis Demetrio et Dragota cum Bylota in
Scelca, item tendens in magno spacio per ipsam siccam vallem, et pervenit ad
magnam stratam Regalem, et transit ipsam viam Regalem versus meridiem in fine
cuiusdam planiciei, deinde tendit versus orientem, et sic pervenit in Oriauam,
in qua eundo superius ad priorem metam, ubi est Nenina mlaka. In cuius rei memoriam
et certitudinem pleniorem presentes litteras ad peticionem dicti Bylote supradictis
Demetrio et Dragota munimine nostri sigilli contulimus roboratas. Actum anno
gracie Mo CCo quinquagesimo sexto.
Vissza
a listára