Capitulum ecclesie beati Petri de Pasga(!) omnibus Christi fidelibus tam presentibus
quam futuris presens scriptum inspecturis salutem in domino sempiternam. Ad
universorum noticiam harum serie volumus pervenire, quod Stephanus filius Borych
bani ab una parte, item Alexander filius Bors ex altera coram nobis personaliter
constituti, idem Stephanus confessus est ministerio vive vocis, quod quia ipse
nobilem dominam consortem, videlicet Alexandri vulnerasset, Margaretha vocatam
et sex servientes ipsius, videlicet Paulum, Stephanum, Jacobum, Benedictum,
Andream et Karachynum interfecisset et insuper quamplures iniurias et dampna
eidem in domo sua irrogasset, ob hoc quandam possessionem suam nomine Zalathnuk
in comitatu de Pasga(!) existentem suam hereditariam metis infrascriptis distinctam
ex permissione et beneplacito ac obediencia omnium consangvineorum suorum ac
vicinorum, videlicet Lamperti de Horsoua et Berizlai de Dubowyk, prefato Alexandro
dedisset, donasset et contulisset, ymo dedit, donavit et contulit coram nobis
iure perpetuo et irrevocabiliter in filios filiorum suorum possidendam ac habendam.
Cuius mete taliter distinguntur: primo a meridie circa Zalathnuc Christophori,
inde vadit iuxta vicinitatem eiusdem Christophori eundo ad occidentem ascendit
ad berch, inde cadit in unum potok et transit potok et cadit in vicinitatem
Bukoa reka; inde vadit ad aquilonem, de inde in vicinitate eiusdem Horsoua ad
orientem ab hinc iuxta Dobouik(!) ad meridiem, inde ad priorem metam tali vinculo
interposito, quod quicunque temporum in processu super ordinacione seu donacione
supradicta per dictum Stephanum Alexandro facte aliquam litis questionem movere
intenderet, ante litis ingressum absque porcione iudicis in quinquaginta marcis
convincatur ipso facto. In cuius rei memoriam firmitatemque perpetuam presentes
concessimus litteras nostri sigilli munimine roboratas. Datum in vigilia festi
decolacionis beati Joannis Baptiste anno domini millesimo CCmo quinquagesimo.
Vissza
a listára