Nos capitulum Quinqueecclesiense memorie commendamus, quod Stephano et Nicolao filijs Jacobi filij Ambrosij pro se et pro magistro Johanne ac Matheo fratribus suis carnalibus ab una parte, item Laurencio et Andrea filijs Johannis de Geredey similiter pro se et pro Philippo ac Matheo fratribus ipsorum carnalibus nec non pro Stephano et Beke filijs Stephani ab eodem Geredey ab altera coram nobis personaliter constitutis propositum extitit per eosdem, quod super vulneracionem predicti Stephani per ipsos Stephanum et Nicolaum filios Jacobi causaliter vulnerati mediantibus probis viris taliter inter se concordassent, quod partes sex probos viros, scilicet Hectorem, Paulum filium Johannis et Beke filium Lonoeti, ydem filij comitis Jacobi, item Stephanum filium Leonardy, Nicolaum filium Alexi et Paulum, ydem filij Johannis de Geredey adducere tenebuntur et coram homine nostro Quinqueecclesiis in octavis Beati Nicolai confessoris nunc venientis secundum proposicionem parcium super facto ipsius vulneracionis ijdem nobiles arbitrabunt inter partes tali obligacione mediante, quod si ydem filij comitis Jacobi de arbitrio dictorum nobilium resilirent in toto vel in parte extunc predictis Stephano et Beke quindecim marcas solvere tenerentur. Si vero idem Stephanus et Beke idem arbitrium non assumpmerent vel assumpmere non curarent, ut premittitur, extunc similiter ydem filij Johannis de Geredey ipsas quindecim marcas eisdem filijs commitis Jacobi pro eisdem solvere tenerentur, ut assumpserunt coram nobis, nichilominus easdem partes assumpmentes, quod si qua pars partem alteram medio tempore, scilicet usque ad octavas ipsius Beati Nicholai confessoris ad presenciam alicuius iudicis super facto ipsius vulneracionis citare vel in litem trahere nitteretur, similiter in supradictis quindecim marcis contra partem alteram convinceretur eo facto, et insuper ad presenciam cuiuscunque iudicis liberam habebit citandi facultatem hoc non pretermisso, quod idem Beke dixit et assumpsit pro se et pro predicto Stephano fratre suo firmiter obligando, quod si de arbitrio predictorum nobilium resilire vel assumpmere non curarent, extunc viginti marcas ante litis ingressum eisdem filijs Johannis de Geredey solvere tenerentur. Datum feria sexta proxima post festum Beati Galli confessoris anno Domini Mo CCCo XXo quinto.