Capitulum ecclesie Colocensis universis Christi fidelibus presentes litteras inspecturis salutem in omnium salvatore. Ad uniuersorum noticiam harum serie volumus pervenire, quod cum iuxta tenorem et continenciam litterarum memorialium magnifici viri magistri Lamperti iudicis curie domini regis et comitis Chanadiensis magister Emericus Comes de Bors et castellanus de Lewa in octavis beati Nicolai confessoris coram nobis comiti Elye de Kalacha viginti et octo marcas partim in denariis Wyennensibus partim vero in grossis Boemicalibus pro possessione Pauli vocata in comitatu de Budrug existente solvere debuisset et facta ipsa solucione idem comes Elyas similiter coram nobis in dictis octavis ipsam possessionem prelibato magistro Emerico perpetuare et priuilegium suum quo mediante dictam possessionem idem comes Elyas ab Emerico presbitero canonico ecclesie beati Laurency martyris de Hoy titulo empcionis comparaverat ad manus ipsius magistri Emerici similiter in nostri presentia assignare debuisset, ipso termino adveniente comes Nicolaus serviens ipsius magistri Emerici nomine procuratorio pro eodem domino suo ad nostram accedens presentiam prefato comiti Elye similiter ad nostram presentiam accedenti viginti et octo marcas vice et nomine domini sui supradicti, soluit coram nobis ut debebat et facta ipsa solucione idem comes Elyas in dictis octavis ipsam possessionem perpetuavit magistro Emerico memorato et privilegium supradictum ad manus dicti comitis Nicolai vice et nomine prefati domini sui recipientis ibidem in nostri presentia asignauit ut debebat secundum formam litterarum predictarum. In cuius rei memoriam et perpetuam firmitatem presentes litteras nostras concessimus sigilli nostri privilegialis munimine roboratas et alphabeto intercisas. Datum in festo beate Lucie virginis. Anno domini Mo CCCo xxmo primo, Demetrio preposito, Johanne lectore, Nicolao cantore, Petro archydiacono, Sudano custode ceterisque canonicis in eadem ecclesia deo famulantibus iugiter et devote et litteras predictas ad maiorem rei evidenciam et cautelam presentibus duximus innectendas.