Excellentissimo domino suo Karolo Dei gracia illustri regi Hungarie capitulum ecclesie Boznensis oraciones in Domino. Litteras vestre serenitatis honore quo decuit recepimus in hec verba: Karolus Dei gracia rex Hungarie fidelibus suis capitulo ecclesie Boznensis salutem et graciam. Cum nos anno Dominice incarnacionis Mo CCCo XXXo nono in octavis festi Asscensionis Domini magnifico viro Thome woyvode Transsilvano dilecto et fideli proximo nostro quandam possessionem nostram Geethmunustura vocatam cum patronatu monasterii eiusdem in comitatu de Baranya prope fluvium Danobii in confinitate possessionis nostre Danouch vocate existentem pro suis fidelitatibus et fidelium serviciorum meritis duxerimus conferendam, fidelitati vestre firmiter et districte precipientes mandamus per presentes, quatenus receptis presentibus vestrum mittatis hominem pro testimonio fidedignum, quo presente Paulus filius Laurencii homo noster accedat ad faciem eiusdem possessionis, et reambulet eandem per veteres metas et antiquas vicinis et conmetaneis circumquaque existentibus legitime factis statuat eidem Thome woyvode perpetuo possidendam, si non fuerit contradictum, contradictores vero si qui fuerint, ad nostram citet presenciam ad terminum competentem contra Thomam woyvodam prenotatum et post hec seriem premissorum cum cursibus metarum ac citatorum nominibus, si qui fuerint et termino assignato nobis fideliter rescribatis. Datum in Wisegrad in festo Conversionis Sancti Pauli anno Domini Mo CCCo XLmo primo. Nos igitur vestre magnitudinis preceptis semper parere cupientes ut tenemur, cum prefato magistro Paulo filio Laurencii homine vestre celsitudinis discretum virum magistrum Stephanum cantorem ecclesie nostre socium et concanonicum nostrum ad exsequenda premissa duximus destinandum, qui demum ad nos reversi nobis concorditer retulerunt, quod cum ipsi feria quinta proxima ante dominicam Reminisscere proxime preteritam ad faciem dicte possessionis Geethmonustora vocatam in comitatu de Baranya existentem et eandem universis et singulis vicinis et conmetaneis eiusdem possessionis legitime convocatis accessissent et presentibus Petro et Johanne filiis Benedicti de Ormand, Cosma filio Stephani de eadem Ormand et ex parte possessionis Moysa Jacobo, Johanne et Hedreh filiis Hedreh, inde ex parte possessionis honorabili capituli Quinqueecclesiensis Merse vocate discreto viro Johanne preposito filio Pauli quondam bani de Macho, ex parte dicti capituli, post hec ex parte possessionis conventus monasterii Saxardiensis Lypolthlaka et Hermanerde vocate, exinde ex parte possessionis conventus monasterii Varadiensis Dalyuk vocate, inde ex parte possessionis nobilis viri magistri Petri dicti Herceg filii Henrici bani Donoch vocate, abhinc ex parte possessionum Stephani, Nicolai et Mychaelis filiorum Johannis de Weyk ac Nicolai filii Pauli similiter de Weyk vocate, exhinc ex parte possessionis nobilis viri magistri Thome filii Petri Lak vocate, inde ex parte possessionis Johannis Nigri Fylipfulde vocate, abhinc ex parte possessionis Tewtus et Vezeus filiorum Emerici Odus vocate per veras et antiquas metas sub quibus hactenus habita fuisset et possessa reambulassent reambulatamque prefato magnifico viro domino Thome voyvoda Transsilvano statuissent perpetuo possidendam nullo penitus contradictore existente. Datum feria sexta proxima ante dominicam Oculi anno vero supradicto.