Excellentissimo domino suo Karolo dei gracia illustri regi Hungarie, capitulum ecclesie Boznensis oraciones in domino. Receptis litteris uestre magnitudinis ad reambulandam quandam terram castri vestri, in qua olym Syle filius Myh et Stephanus filius Chuda morabantur, per antiquas metas eiusdem et magistro Johanni filio comitis Gyleti statuendam, si non fieret contradictum, cum Jacobo filio Marchardi homine vestro, magistrum Petrum socium et concanonicum nostrum pro testimonio duximus transmittendum, qui quidem homo uester et noster demum ad nos reuersi, nobis dixerunt, quod ipsi ad faciem dicte terre personaliter accedentes, conuocatis omnibus conmetaneis et vicinis eiusdem eandem per metas veteres et eciam novas ubi necesse erat presentibus eisdem reambulatam, nullo contradictore existente, sub metis infrascriptis eidem magistro Johanni filio comitis Gyleti statuissent et assignassent perpetuo possidendam. Cuius quidem terre, sicut iidem nobis retulerunt, mete hoc ordine distinguntur: Prima meta incipit in fine ville Kelemen vocate in arbore harazth meta terrea circumfusa a parte occidentis vbi separatur ab eadem terra Kelemenus. Abinde procedit versus meridiem per metas nouas et antiquas erectas, usque ad terram filiorum Zayhan, ad duas arbores harazth, sub quibus sunt due mete terree. A parte septemtrionis est meta magistri Johannis filii Gyleti, a parte vero meridionali est meta predictorum filiorum Zayhan. Abhinc iuxta terrarn eorundem versus orientem per siluam procedendo, venit ad arborem harazth, sub qua sunt tres mete terree, vbi relicta eadem terra filiorum Zayhan procedit in vicinitate terre nepotum Twrda, videlicet Petri filii Simonis, Laurencii filii Stephani et Demetrii filii Laurencii vsque ad duas metas terreas de nouo erecta. Abhinc reflectitur versus meridiem circa terram Budow maioris exercitus, Thome filii Benedicti et filiorum Doym. Ince procedendo in paruo spacio transit quemdam locum et peruenit ad vnam semitam circa terram Andree filii Cheme et Thome filii Stephani. Deinde eundo venit ad villam Kelemen antedictam ad priorem metam, ibique terminatur. Datum in dominica exurge, anno domini millesimo CCC° XX° primo.