Excellentissimo domino suo K[arolo] Dei gracia illustri regi Hungarie capitulum ecclesie Boznensis inclinacionem et oraciones in Domino debitas et devotas. Receptis litteris vestre serenitatis reverenter cum Nycolao filio Boor homine vestro ad sciendum et inquirendum infrascripta nostrum misimus hominem pro testimonio fidedignum, qui ad nos reversi concorditer retulerunt, quod a nobilibus de comitatu de Wlko diligenter inquirendo scivissent viginti tres villas magistri Pauli dicti Kozol filii magistri Stephani de Gara et domum Mathei filii Byze servientis eiusdem simul cum villa et proprias domos et edificia ipsius magistri Pauli per Demetrium filium Elek, Simonem filium Petri, Dobov, Ghethev et Leukus filios Dominici nobiles de Azaryas omnino conbussisse et omnibus bonis rebus scilicet mobilibus et immobilibus spoliasse, domos autem proprias eiusdem magistri Pauli super dominam uxorem eiusdem dixerunt combusisse. Datum in crastino diei festivitatis Sancte Trinitatis anno Domini Mo CCCo tredecimo.